Буряад Уласай Үндэһэтэнэй номой санда Агния Бартогой буряад хэлэндэ оршуулагдаһан, Буряадай гүрэнэй хэблэлдэ аяар холын 1941 ондо хэблэгдэһэн номуудые олоһон тухайгаа Максим Мартынов Facebook хуудаһандаа бэшэһэн байна.
Найман хуудаһатай, нэгэ-нэгэ шүлэгһөө бүридэһэн «Девочка чумазая» болон «Девочка ревушка» гэһэн багахан номуудай авторнууд Агния болон Павел Бартонууд болоно. Буряад хэлэндэ эдэ шүлэгүүдые Цэдэн Галсанов оршуулжа, Жамса Тумунов редактура хэжэ, «Затагархан басаган», «Бархируухай басаган» гэһэн нэрэтэйгээр хэблэгдээ. Голхортойнь гэхэдэ, эдэ номууд зурагуудаар шэмэглэгдэнхэйшье һаа, уран зураашын бэлэн бэшэ ажал хэнэйб гэжэ заагдаагүй.
Ирагуу найрагша, радиодо хүтэлэгшэ, сценарист, Сталинай хоёрдохи шатын болон Ленинэй шангуудай лауреат Агния Львовна Барто 1906 оной февралиин 17-до түрэһэн юм. Мүнөө ирагуу найрагшын түрэһөөр 115 жэл үнгэрбэ. Гэбэшье Агния Барто тухай мэдээсэл харахада, тэрэнэй түрэһэн үдэр, газар тухай ондо ондоо мэдээсэл үгтэнхэй байдаг.
Тэрэ уран зохёол бэшэхэһээ гадна Эсэгэ ороноо хамгаалгын Агууехэ дайнай үедэ бэе бэеһээ хахасаһан,таһарһан мянгаад тухай гэр бүлэнүүдые бэдэржэ, оложо, уулзуулха талаар 1964 онһоо 1973 он болотор юһэн жэлэй туршада «Ищу человека» гэһэн радио дамжуулга бэлдэдэг һэн. Удаань энэ дамжуулгань «Жди меня» гэһэн телевизионно дамжуулгын үндэһэн боложо үгөө.
