Тус суглаанда Үбэр Байгалай хизаарай, Усть-Ордын Буряадай тойрогой, Монголой аймагуудай засаг зургаанай, Россотрудничествын, Монголой буряад соёл, ёһо заншал хүгжөөхэ талаар жасын, шажан мүргэлэй, олондо мэдээсэл тараадаг хэрэгсэлнүүдэй түлөөлэгшэд хабаадаа. Энээн тухай Агын Буряадай тойрогой захиргаанай мэдээсэлэй албан дуулгана.
Эпидемиологическа байдал хараалан, федеральна түбтэй, Роспотреб-хиналтата хэлсэһэнэй удаа наада үнгэргэхэ болзор үшөө тодорхойлогдохо.
- Фестивальда хабаадагшад, айлшадта гэжэ ехэ программа бэлдэгдэнэ. Тэдэнэр Агын музей, байгаалиин хүшөө, соёлой баялигтай танилсаха, - гэжэ тойрогой захиргаанай хүтэлбэрилэгшэ Буянто Батомункуев хэлэбэ.
Июлиин 29-дэ уласхоорондын эрдэмэй-практическа хуралдаан үнгэрхэ. Хэмжээ ябуулга эмхидхэгшэдтэй бэдэрэлгын ехэ ажал ябуулһанай дүн гаргажа, «Летопись Алтарганы» гэһэн номтой танилсуулха юм. Фестивалиин үдэрнүүдтэ Даши Намдаков, Жигжит Баясхалановай хубиин үзэсхэлэнгүүд дэлгэгдэхэ, тиихэдэ «Алтарганын түүхэ» гэһэн архивна материалнуудай үзэсхэлэн олоной һонорто дурадхагдаха.
«Алтаргана» нааданай үедэ Ородой болон Монголой мэдээжэ эрдэмтэн, олониитын ажал ябуулагша Цыбен Жамцаранодо хүшөө нээгдэхэ. Түрэл гаралаа бэдэрхэ «Ищу тебя» гээһн түсэл бэелүүлэгдэхэ юм.
- Фестиваль эмхидхэлгын дүй дүршэл хараалан, нааданай нээлгын, хаалгын ёһололой, эгээл һонирхолтой талмайнуудһаа сэхэ дамжуулагдаха, - гэжэ Буянто Батомункуев тодорхойлбо.
Можо нютагуудай олондо мэдээсэл тараадаг хэрэгсэлнүүдэй болон хари гүрэнүүдэй түлөөлэгшэд апрелиин 5 болотор аккредитаци гараха ёһотой. Хэрэгтэй бүхы мэдээсэл «Алтарганын» сайтда толилогдохо.
Наһанай хизаарлалта 0+
