Росси дотор энэ хэрэгтэ гүрэнэй жасаһаа 550 сая түхэриг гаргашалагдана.Тиин Буряад Уласай номой сангууд табан миллион түхэригэй шэнэ номуудые абаха болобо.
Номуудые абаха хэрэг гүрэнэй программануудта оруулагдаагүй байһан һаа, мүнөө “Соёлой хүгжэлтэ” гэһэн программада оруулагдаба. Энээн тухай Ородой Засагай газарай Тогтоол гэршэлнэ. Номой жасанууд ехээр хуушараа, зариманиинь уншахын аргагүй болоод байна. Һүүлэй үедэ Буряад Уласта номой сангуудта яһала анхарал хандуулагдадаг юм.
- Аймагуудаар модельнэ, шэнэ түхэлэй номой сангууд баригдажа нээгдэнэ. Алексей Самбуевич Цыденовэй туһаламжаар, анхаралаар 2020-2021 онуудта уласай бюджедһээ номуудые абалганда 7 сая түхэриг үгтэһэн байгаа”, - гэжэ Буряадай соёлой сайд Соёлма Дагаева хубаалдана. Уласай һанһаа үгтэһэн мүнгэндэ ород болон хари гүрэнүүдэй классическа, мүнөө үеын авторнуудай, олон һалбаринуудаар хэрэгтэй эрдэмтэ литература, журналнууд, энциклопединүүд, тэрэ тоодо хүүгэдэй уншаха номууд олоор абтагдана. Эсэгэ ороноо хамгаалгын Агууехэ Илалтын 75 жэлэй ойдо зорюулагдан, дансата болон баримтата номуудаар сангууд баяжаа. Буряад хэлэн дээрэ номуудые олон болгохо талаар ажал ябуулагдана.
