Тэдэ “Пушкинская карта” хэрэглэн, тоглолтыень баясан хараа.
«Pro Балет» гэһэн һонирхолтой үйлэ хэрэг Буряад Уласай байгуулагдаһаар 100 жэлэй ойдо зорюулагдана. Бүхы аймагуудаар харуулагдахаар түсэблэгдэнхэй. Тэдэнэй түрүүшын харагшад Хойто-Байгалай аймагай ажаһуугшад болоо гээд тэмдэглэе.
Нижнеангарск һууринда эмхидхэгдэһэн тоглолтодо залуушуул олоор суглараа. 1-дэхи һургуулиин үхибүүд бүхэдэлхэйн соёлой баялигтай танилсаба гээшэ. Ушар гэхэдэ, тоглолтодо дэлхэй дээрэ мэдээжэ баледэй хэһэгүүд оруулагданхай. Жэшээлбэл, А.Аданай “Корсар”, П.Чайковскиин “Лебединое озеро”, Н.Римский-Корсаковой “Шахерезада” гэхэ мэтэ. Хажуугаарнь мүнөө үеын хатарнууд олоной анхаралда дурадхагдаа.
- Эдир залуу харагшадта манай түсэл зорюулагдаа. Тоглолтын үедэ балет яагаад зохёогдооб, юун тухайб гэжэ ойлгуулаабди. Мүн мэдээжэ композиторнууд тухай хөөрэлдөөн эмхидхэгдээ. Иигэжэ олондо харагдаа үзэгдөөгүй баледэй урлалда арад зоной дурыень буляалгуулха түсэбтэйбди. Манай түсэл хараад, залуушуул хуби заяагаа соёл урлалтай ниилүүлхэ бэзэ гээд найдагдана. Ерээдүй Рудольф Нуреев, Майя Плисецкая, Вацлав Нижинский гэгшэд харагшадай дунда байжашье магад, - гэжэ «Pro балет» түсэл зохёогшо Павел Окунев хөөрэнэ.
Хойто-Байгалай аймагай засаг дарга Игорь Пухаревай хэлэһээр, ургажа ябаа залуу халаан соёл урлалда дурлажа байһандань баярламаар.
- Гүрэн доторнай “Пушкинская карта” ехэ хэрэгтэй, һайн юумэн бүтээгдэжэ байнхай. Энээнэй ашаар томо-томо театрнуудай артистнар холын нютагуудаар ябадаг болонхой. Хойто-Байгалай аймагай үхибүүд баледтэй танилсахадань, ямар гоёб даа, - гэжэ Игорь Пухарев хэлээд, оперо болон баледэй театрай артистнарта баяраа мэдүүлээ.
