Юуб гэхэдэ, хүн өөрыгөө, сэдьхэлэйнгээ байдал тон һайн мэдэжэ ябахадаа, тойроод байһан оршон тойронхиие эрхимээр ойлгожо, ямаршье хүндэ хүндэтэйгөөр хандаха ухаатай, уужам сэдьхэлтэй байдаг ха юм.
Мүнөөнэй түргэн бушуу, хубилжа байһан сагта хүн гээшэ сэдьхэлээ тэнюун болгохын тула медитаци хэдэг болонхой. Медитаци гээшэмнай юун гээшэб? Энэ болон бусад асуудалтайгаар психолог- мэргэжэлтэн Маргарита Дамбаевада хандабаб.
- Сайн байна, Маргарита Жаргаловна.
- Сайн байна, Дарья.
- Медитаци гээшэ юун бэ? Юугээрээ хэрэгтэй юм? Манай уншагшадта ойлгуулжа үгыт даа.
-Хүн түрэлтэн медитаци гээшые урдын сагһаа хуу хэрэглэдэг байһан. Бурханай ном соо байдаг. Мүнөөнэй сагта эрдэмтэд тэрэниие шэнжэлжэ үзөөд гаргахадаа, медитаци хэхэдээ, хүнэй уураг тархиин нейронуудай холбоон заһарна гээ. Медитаци гээшэ элдэб янзын байдаг. Ямар зорилготойгоор медитаци хэнэбши, тэрээнһээ дулдыдаха. Жэшээнь, бэеэ аргалха, сэдьхэлээ заһаха медитацинууд байха. Микрокосмос гээшэ хүнэй досоо байдаг. Макрокосмос гээшэ газаа тала болоно. Медитаци соо бидэ микрокосмос руугаа орожо, байдалаа, сэдьхэлээ заһанабди.
- Маргарита Жаргаловна, та саг үргэлжэ Буряад орон соогоо удхатай, һонин түсэлнүүдые бэелүүлдэгта. Һаянай үнэрнүүдэй илгаа шэнжэлнэб гэжэ хөөрөө һэнта. Тэрэ ямар удхатай болоноб?
- Нэн түрүүн үнэр гээшэ амидаралай, ами наһанай, амиды байһанай жаргал үзэхэ гэһэн удхатай болоно. Үнэрөөр өөрынгөө сэдьхэлэй байдал заһахада болохо. Манай орон нютагай үнэрнүүд гэхэдэ, хэр угһаа хэжэ байһан ажалтаймнай нягта холбоотой. 5 хушуу малнай эгээл сэнтэй. Бүмбэр сагаан хонидоо дахажа ажамидарһан манай аба эжынэр. Тиигээд ехэ һонин ажаглалта хээб. Хониной нооһоной үнэр хүнэй серотонин гормон һэргээнэ. Нооһоной үнэр гээшэ - гэр бүлын, дулаанай мэдэрэл түрүүлнэ. Иимэ үнэр абахадаа, бэе соомнай баярай гормон һэргэнэ. Нооһоной натуральна хубсаһа үмдөөд ябахадаа, серотонин бии болодог. Дээшээ хүгжэхөө һанаа һаа, серотонин һэргээхэ хэрэгтэй. Үнэрэй илгаа гээшэ ехэ һонин лэ байна даа.
